سمة اللي ودك أصلا.. ماتهم التسمية

[ندعوك للتسجيل في المنتدى أو التعريف بنفسك لمعاينة هذا الرابط]

::

::
يعتريني حزن .. مدري حالة من الاكتئاب
سمة اللي ودك أصلا.. ماتهم التسمية

المهم اشعر بضيقة صدر وشوي اغتراب
لا ذكرت اني أعيش بعصر..لا للتضحية

عصر فيه من العجب مالا يريك أية عُجاب
يعني فيه من الغرابة .. ما يثير السخرية

خل عنك التقنيات اللي يسيل لها اللعاب
انا في حاجة بشر.. ماني بحاجة تقنية

وإلا ويش الفايدة ؟ ل:اللي ركض خلف السراب
لا وصل يمه .. ولافكرة رجوعه مجدية

ينتهي وضعه مثل وضعي .. فلا ودى وجاب
عايش بروحي مع اني في نطاق التغطية

ودي ا بّدي للحظوظ المايله بعض العتاب
بس ما للحظ شغل وحالتي مستعصية

كم خسرني من حبيب وكم خسرت من القراب
والخسارة واحدة.. دام الوجيه مقــفية

ول.. يا سيف القطاعة والخصيمة والغياب
ليت ينفع فيك أمر العفو او دفع الدية

كان بمديني دفعت اللي دفعت من الرقاب
والا أطيح بقبضتك أموت موتة مضنية

لي ثلاث سنين فاقدني والاقيني مصاب
والمرض أحيان ناتج من تعاطي الأدوية

فيقطع الله من تغذوا في قفاي من الصحاب
بئس والله ما كلوا مني وبئس التغذية

كلما امنح ثقة لإنسان .. سّوى انقلاب
ناقص الا يصدر بحقي قرار التصفية

عشت نوع من التخبط في قراراتي وطاب
خاطري من كل مستقبل وحلم وامنية

لي متى؟ وأنا أعاني من توتر واضطراب
في شعوري الداخلي بين الندا والتلبية

اسمع الدنيا .. ولا ألبّي .. وأنا سمح الجناب
ردنّي عن شرها .. ديني وحسن التربية

قول كيف اصمد ؟ وأنا في وسط غابة من ذئاب
يجبرونك ع الخطا وأشياء ماهي مُرضية

صح ماهو بمنطق استسلم لمبداهم.. و أهاب
بس مانيب ( إبن حنبل ولابن تيميه)

شاعر ولو كنت صاحب فكر و آرائي صواب
لازم اضعف يوم .. قدام الحياة المغرية

والدليل إني كثير أحيان .. لا املك جواب
لو سألني أحدهم وين الدروب مودية ؟

ادري إني من تراب .. وفي طريقي للتراب
بس مدري لي متى وأنا اقترف لي معصية ؟

كلما حطيت لفراقي عن الدنيا.. حساب
فز شيطاني على نظرة فتاة ... واغنية

ليتني أذنبت ذنب وخفت من تالي العذاب
كان حالي ما غدت هالحين.. حالة مزرية

بس أجاهر في معاصيّي علشان الشباب
يعجبون بقدرتي عند اللهو والتسلية

(عفوك اللهم ) يوم يحين تسليم الكتاب
يوم ما تنفع معاه الواسطة والتوصية

يوم لا يستر عُري الآدمي لبس وثياب
وقتها تشوف الذنوب اكبر عوامل تعرية

من دموعي .. أوديه بتفيض وتسيل الشعاب
وآه يا جد ب الشعاب ويا جفاف الأدوية

ف لاتسمي حالتي .. ياخوك حالة اكتئاب
هذا تأنيب الضمير إذا تصح التسمية

شوف وجهي وأنت تدري ليه ماكني بشاب
كني من كثرة ذنوبي شايب وعمري مية
::
::
مما رآق لــي

وإلا ويش الفايدة ؟ ل:اللي ركض خلف السراب
لا وصل يمه .. ولافكرة رجوعه مجدية
يعطيك العافيه دايم متألق